الحلقة٥و٦و٧و٨

الحلقة الخامسة :
نهار الفاتحة : رحت أنا و سارة و إسمهان للحفافة و جبناها نهار كامل و حنا نوجدو في روحنا ...جاء الطاهر وصلنا للدار  و قاللنا دار العريس راهم جاو و خلاص ...دخلنا للدار و طلعنا ديراكت نجريو نلبسو في قشنا  أنا لبست روب ميني سامبل بلو توركواز و صوندال كيفها بعد و ليزيكسسوار أرجونتي و البوشات كيف كيف و شعري عملتو كيرلي و طلعتو بمساك ارجونتي على جنب والله جيت نقتل موش نشكر في روحي بصح أنا من النوع الي مايديرش الماكياج خلاااه و نلبس حجاب ستيل سروال و ليكات و خلاااص يعني عمري مانحب نبرز أنوثتي حتى العراس مانروحش خلاااه ...
دخلنا للصالون و تلاقاونا بنات عمتي الكبيرة قالولنا العريس أو دخل و راهو يلبسلها في الخاتم و وجوههم مبدلة خاصة كي دخلت أنا واشي يشوفو فيا غولة و لا غيارة للدرجة الي مانحضرش للخطبة تاعها ..عجب ..
نهز عيني نشوف العريس نلقاه مهدي حبيبي ...يا ليتني متت و ما صراليش موقف كيما هك بنت عمي الي كي أختي و صاحبي عشرة 4سنين من  عمري ...سارة و أسمهان حاكميني خاتر كانو يعرفوه و تصدمو أكثر مني كي شافوه ..يجبدو فيا باه نروحو ...و كان الغاشي بزاف لحد الآن مازالو الخاينين ماشافونيش ...
رحت انا و البنات خواتاتي للكوزينة و باقيين يصبرو فيا و أنا في غيبوبة بغيت نبكي بصح دموعي تحجرو في عينيا .. قلتلهم نرجع للصالون كانو يحاولو فيا مانروحش بصح أنا قررت نشوف مع عينيهم و نباركلهم على الخيانة و على ظهري الي طعنوه من غير رحمة نباركلهم على حياتهم الجديدة المبنية على حطام قلبي و سنين عمري و دموع عينيا ...
لبسلها الخاتم و باقيين يتصورو دخلت حتى وصلت قدامهم ...
صبرينة : ميمي....!!
ميمي : صبرينة !!!!!
صبرينة : قدمت عندها و سلمت عليها و قلتلها في أذن "مبروك عليك" و في الأذن الأخرى "يا خاينة " و ثم ثم تبدلت الضحكة الي كانت مالية وجهها وولات عينين معبيين بالدموع ...
أما الطحان تاع حبيبي بقى فمو محلول و هو يشوف معايا و أنا في كامل أناقتي الي عمري ما شافني فيها ...جات غنية" إيماان و في ليلة عرسك نبكي ويدان "" ....و ناضو البنات يشطحو و من غير ما نحس لقيت روحي نشطح ولا بمعنى أوخر كنت نتخبط كي الطير المجروح ... ونحكم في دموعي بالسيف ..

الحلقة السادسة :
رجعت لبلاصتي قدام خواتاتي و بقيت قاعدة حاطة رجل على رجل و ناكل تقول نطيش فيها من ورايا ...و مهدي يتفرج معايا حتى نشوف  قرصاتو ميمي على ذراعو ...
فضت الفاتحة سلامات و ماعملتش حتى فضايح و ماعملتش حاجة في روحي و حبيبي راح يتزوج ببنت عمي الي أكثر من أختي تسمى أنا هي الخاسر الأكبر في الحكاية كل ... فاتت عليا ليلة كحلة غير الموت فرات مازارتنيش نبكي و ندعي في ربي نموت و مانحضرش لعرسهم ....
طلع النهار و انا خيال تاع بنآدم ..ماما تهدر معايا و أنا في العالم الآخر ...الضحكة الي كانت مزروعة في وجهي ذبلت و ماتت...
فات شهر و زوج و أنا في حالة الإحباط هذيك و أنا كل يوم نتفرج مع ميمي تقضي في شورتها داخلة خارجة  بالساشيات الكحل ..
ماما : واش بيك يا بنتي دافنة روحك بالحياة لا ضحكة ولا تبسيمة علاه هذا كل على الزواج ؟ درك تزوج بنتي و دير دار كي البنات كل ؟ و هذيك الخراية (ميمي) درك تشبع من رايها تحساب كي بطلت قرايتها و راح تزوج راح يهنيها الراجل ؟؟ انتي على الأقل شهادتك في يدك ...ديجا هكي صاكك و أخرجي حوسي على خدمة ديري الصوارد و قلشي روحك ...
صبرينة : ماعرفتش علاه هدرة ماما رجعتلي شوي أمل في الحياة الي ظلامت في وجهي ...
غدوة على الصباح نضت بكري لميت الدوسي تاعي و رحت دفعتو في واحد الكونكور ...بلاك تصلح ... جاء نهار التعڨاب عڨبت ..
فاتو شهرين حتى نسيت عليه و قلت أكيد مافيهاش ...
عماد : واينك أ لالة ...صبرينة .. صبرينة ..
صبرينة : واشي تعيط على راسي مع الصباح ؟؟
عماد: هاكي حلي تره أ لالة البرية هاذي جابها درك الفاكتار ...
صبرينة : واش من برية تاعك هذي هات هنا ... جيت نفتحها و نلقاها إستدعاء للإختبار الشفهي لقد تم قبولك في الإختبار الكتابي ...ههههه فرحت ...ماتوقعتش خلااااه خاتر كانو زوج مناصب برك على مستوى الولاية ...
وجدت روحي لبست و حطيت الحطة و رحت للشركة ماقلتلكمش أنا إختصاصي محاسبة ...وصلت كنت أنا و 3أخرين غير أنا طفلة و مدير الشركة يستنى فينا ...لازمني ندي بوصت لكن نقتلهم كل ...
المدير : تفضلي أقعدي...
صبرينة : يزيد فضلك ..
بدأ يسقسي فيا على قرايتي من بعد أمور شخصية .... واش مرتبطة و لا عازبة .
صبرينة : والله يا سيدي المدير سيليبايرة ...
المدير : ههههههه ضحكتيني
صبرينة : هههه ( واش بيه هذا عجباتو هك خلاه ؟؟) أك تعرف الرجال نقصو و حنا النساء نتناغلو كي الدود مالا هانا قاعدين ...
المدير : ههعههههههههههههعه والله غير دمك خفيف ..
صبرينة : هههههه خفيف حتى قريب ماعنديش دم
المدير : ههههههه ههههههه احم أحم نرجعو لموضوعنا ...مبروك عليك البوست ..على الأقل تضحكينا شوي ...
صبرينة : لاه تشوف فيا قرد هنا هههههه
المدير : هههههههههه ههههه راح تفلڨيني بالضحك أطفلة أخرجي عليا ههههه
صبرينة : فيلامان الحاج والله فرحتيني ...

الحلقة السابعة :
روحت للدار طايرة بالفرحة مع قلت لماما ضربتها بزغروتة جاو العايلة كل يجريو ...
أم ميمي : خير نشالله واش خطبو صبرينة ..
ماما : لاااااه الي يزوج برك يفرحولو؟؟؟؟ ...بنتي حكمت خدمة كبيرة و تولي تضرب  و تڨلب واش دير بالزواج أخيتي مازالت صغيرة و دار باباها طووول و عرض ..
صبرينة : ماما بردتلي قلبي ههههههه
كلينا الطمينة و خرجنا الطاهر خويا تعشينا برا و الدنيا كل فرحانة و زاهية ...
سمانة و نروح نمضي العقد و نبدأ الخدمة بصح النهار الي رحت خلعوني بواحد الشرط أنا ماكنتش دايرتلو حساب " تربص لمدة 6أشهر " وين ؟؟ في فرنسا ...و طاحتلي الدمعة نعرف أنهم خاوتي يقتلوني و مايبعثونيش وحدي ...الجامعة و قريت غير عند رجليهم ...
روحت للدار و الناس كامل تسقسي واش درتي فيها ؟؟ و أنا مالقيت منين نبداها ..
صبرينة : بابا بغيت نهدر معاك ...
بابا : اهدري واش بيك ساكتة ؟؟
صبرينة : اليوم كي سنييت العقد دايرين شرط ... نروح لفرانسا تربص 6شهر ...قبل مانبدأ ..
بابا : فرنسا ؟؟؟؟؟  و كيفاه ؟؟
صبرينة : تكاليف الإقامة كل عليهم من صوارد البييي تاع الطيارة و روح ..
بابا : و انتي باغية تروحي ؟ قادرة على حوالك ؟؟
صبرينة : مانعرف خايفة بصح لازم ..
بابا : شوفي واش نقول لبنتي انت درك كبيرة راكي 24سنة تعرفي صلاحك توكلي على ربي و ربي يسهل ..
صبرينة : و الذراري ؟؟
بابا : واش بيهم ؟؟ وليد عماد الطاهر هاااااا مخلوقة واينكم ..عيطلهم بابا كل و جمعهم  ... صبرينة رايحة ستاج لفرونسا مانحب حتى واحد فيكم يهدر ولا يقول لا ..
ماما : يا سعدي ببنتي ياااا سعدي تسمى رايحة لفرانسا ؟؟ يوووون نشبع فوخ و زوخ ..
الذراري خاوتي ...قعدو يهدرو تحت خشمهم و راحو من بعد هدرة بابا ماكانش حتى هدرة ....

الحلقة الثامنة :
دخلت لبيتي و أنا موش مصدقة ...والله كون يسمع مهدي ؟ أووووف مهدي ....مابقى والو الزوج عباد الي كنت كي نفرح ولا نقلق نعيطلهم طعنوني في كتافي بقيت وحدي ... عيطت لسارة و أسمهان و فرحولي خلاه و بداو يوجدو في لاليست تاع الحوايج الي نجيبهملهم ...
جاء نهار السفر ...
وليد : اتهلاي في بلاديومة برك ..
عماد : هاهو السيت تاع الحنوت كي توصلي نعتلك واش تجيبيلي سمعتي ؟؟
الطاهر : عندك على روحك سمعتي ؟
ماما و أسمهان و سارة يبكو عليا و أنا قلبي تقطع و بابا كمل معايا الإجراءات كل ...
ركبت في الطيارة رايحة لبلاد الناس وحدي و بدات تضربني الخلعة و موش عارفة الي راهو يستنى فيا ماكنتش نعرف حياتي راح تتقبل 180° ..
هبطت الطيارة و هبطو مصارني معاها ...موش مصدقة باريس ؟؟!!!
لقيت مدام ليندا مسؤولة التربص تاع الشركة في فرنسا تستنى فيا ما نقدرش نوصفلكم كيفاه كانت واااااو تقتل في الزي و ستيل خلااااه .
مدام ليندا : اهلا بيك في باريس ..صبرينة ؟؟
صبرينة :(توقعت تحرقني بالفرنسي و أنا على قد حالي  فرحت 😁😁)  لاباس مدام الحمد لله ..
مشيت معاها للدار الي كرتهالي الشركة دخلنا كان ستيديو صغير بصح فيه الي يلزمني كل ...أول حاجة عملتها فتحت الفايبر عيطت لدارنا طمننتهم على أحوالي و نعتلهم الدار و الطريق و كل شيء و المدام ليندا واقفة من هيك تشوف معايا ...كملت مع دارنا ..
ليندا : زيدي عيطي لحبيبك ماتحشميش مني نورمال ..
صبرينة : ماعنديش ....
ليندا : أمبوسيبل الزين هذا كل ماعندوش حبيب ؟
صبرينة : كان عندي و راح ...
ليندا : اوووه سوري حبيبتي  ماعليش الرجال كل قلال الخير ..
نعتتلي جدول التربص تاعي نقرأ من 08:00 حتى 11:00 و الباقي تطبيقي.. مدتلي الأرقام تاعها و تاع إيمانويل هذا المسؤول الآخر الي معانا في التربص ....يتبع