الحلقة ٢و٣و٤ عاهرة اما بعد

الحلقة الثانية :

بايتة الليلة هذيك نبكي مخددتي تقطر كنت كي المهبولة من الميكرو للبورطابل نخروض مافتحش الفايس و بورطابلو مغلوق ... واش راح ندير و أنا من الي عرفت صلاحي و أنا معاه كان يقلي انتي مرتي كنت متوقعة الصيف هذا يجي يخطبني بصح طلع رخيس فرط فيا بالساهل و الي يوجع في الحكاية أنو مادرتلو والو.  العكس أنا الي كنت مرة على مرة نحكمو يخون فيا و نقول ....نكبر عقلي أنا هي الرسمي ...ظهر 4سنين يحشيلي و يكذب عليا جاب بيا الوقت و طيشني و أنا كي الهايشة من الي يقلي نخرجو ندير المستحيل و نكذب على خاوتي و نخرج معاه ...
فاتت سمانة و مهدي مابان عليه حتى شيء كنت محطمة حتى ميمي الكلبة ماطلعتش و ماسقساتش عليا و أنا ماكانش عندي صحابات أكم تعرفو صحبة الجامعة تفض مع الديبلوم ...
ماما : أهبطي كسري وذنك بلاك تفهمي ...
صبرينة : خليني ماما والله مورالي في الزيرو و انتي تبعثي فيا نقرعجلك ..
ماما : أوقفي توقفلك عرعورة في ظهرة نهار كامل و أنتي راقدة كي العزري قتلك روحي ...
صبرينة : أووووف هاني رايحة ...
ماما : و هزي رجلك شوي ماتهبطيش كي العسكري بلاك تسمعيهم يهدرو عليا ..
صبرينة : والله يا انتي يا ماما ...
ماما حست كاينة حركة غير عادية في بيت عمي لتحت ...و بعثتني نتوقب ...
دخلت كي الجاسوسات على. رؤوس صوابعي حتى نلقى مرت عمي الصغير و نانا و عمتي المطلقة عندهم و دايرين يشوفو في حاجة ... و نسمع غير يووون يهبل ييييي تقتل .. حتى وقفت عند رؤوسهم .. نلقاهم يشوفو في حاجة في برطابل ميمي ... 
صبرينة : صباح الخير ...
عمتي : أرواحي أرواحي تشوفي ..  
غير ميمي تخلعت و صفار وجهها و قريب تسحتني ..
كي شافوها الباقي عملت الجاست هذاك و خبات البورطابل تاعها فهمو أنها موش باغية تنعتلي ... راحو كل وحدة لدارها و بقيت أنا
صبرينة : واش كنتو تشوفو ؟؟؟
ميمي : والو ....ديمودال تاع قنادر برك ...
صبرينة : هاتي نشووووف ..
ميمي : طاحتلي لاشارج من بعد نعتلك ...
صبرينة : ههههه تتمسخري ؟؟ أااااا مشكوك في أمرك .. واش مخبية عليا ؟؟
أم ميمي ::ميييمييي أرواحي للقاطو تاعك او طاب ...
صبرينة : ممممم درتي القاطو ؟؟
ميمي : ههه كعبرتو برك روسات تاع أم وليد ..
صبرينة : مالا نذوق ..
ميمي : لا ...قصدي خلي نڨارنيه و نبعثلك قسمتك ...
حسيتها تليكيدي فيا ولا بمعنى آخر تسحت فيا ....هزيت روحي و روحت للدار ...
ماما : هاه واش كاين كل متلميين ؟؟؟
صبرينة : هاه روحي روحي..... الكلبة تاع ميمي قريب تسحتني ... مالقيتهم يديرو في والو يشوفو في ليمودال برك و الطماعة كعبة قاطو بخلتني فيها ...
ماما : ليمودال ؟؟؟ و القاطو ؟؟؟ اااااا هذي ماتكون غير حكاية خطبة  سيييير راح يخطبو لعبد الله و نقص ذراعي منااا إذا ماكانوش راح يخطبولو ..

الحلقة الثالثة :
صبرينة : يعني ؟؟ أااا عليها دخلو في بعضاهم ..؟؟  ظز عليه البقوقو هذاك خافو نبكي كي نسمع بيه خطب ؟!
ماما : هيه أقعدي برك أنتي شركي هكاك فمك تراباتك كل أم بديارهم و أولادهم و أنتي أقعدي خيري برك من خلقتك الباهية ...و عبد الله تاع وجهك الزين و الدين و رضاية الوالدين وينو الزهر كان خطبني فيك و الله لا ما نديرلك ليمينوت و نزوجك ليه بالسيف ...(راحت )
صبرينة : ههههه مهبولة نبع الحنان والله كي تعود تهدر معايا تقول من تنظيم داعش و أنا وحدة من الأسرى السوريين ...
مهدي والله ما بان عليه والو ...نجي نحل الفايس نلقاه بلوكاني ...أاااا الحكاية صح موش تمسخيرة واش ندير ؟؟؟ لازمني نهدر. معاه ...
لبست حوايجي و قلت لماما رايحة عند إسمهان أختي و قررت نروح عندو للحنوت ...ماحكيتلكمش عليه اااااه يا قلبي ... بقلاوة معسلة بعسل حر ... حبيبي أبيض و طويل و الكور مخدوم و عندو لحية و هذا هو الرسمي ... عمرو 27سنة و عندو حانوت يبيع قش الذكورة و هو مانحكيلكمش عليه واش ستيل و يعرف يلبس ...و عندو إيبيزا ... كان بين عينيا الزوج المثالي خاتر كانت عائلتو من العائلات المحترمة عندنا في المدينة ...
وصلت قدام الحنوات دخلت لقيتو مع صاحبو ..صاحبو جبد روحو و خرج خاتر يعرفني و كيفاه مايعرفنيش و أنا كنت تيكي محروق معاه ...مهدي واش راك ؟
مهدي : واش جابك ماخي قتلك خلاااص ماكانش مكتوب بيناتنا ...
صبرينة : غير قالهالي الهدرة هذي تعباو عينيا بالدموع و بديت نبكي و الهدرة الي سمانة كاملة نلم فيها راحت وليت نقول .بصح ..أنا ...مهدي ...علاه ..
مهدي : أسكتي صبرينة انتي لاباس عليك بصح أنا و انتي خلاص مانليقوش مع بعضانا ...
صبرينة : (مسحت دموعي و إستجمعت قوتي ) علاااه واش كاين في واش غلطت ...أهدر بردلي قلبي ؟؟
مهدي : مانحبكش صبرينة ...نحب وحدة أخرى ..
صبرينة : حليت عينيا فيه و أنا نتمنى نكون نحلم ولا الي سمعتو هذا ماسمعتوش ...
مهدي : خلاااص ماتزيديش ترخسي روحك ..خاتر رايح نخطب ؟؟
صبرينة : هنا بغيت ندوخ كنت نكذب في وذنيا صح قالها صح هدرها و ماحشمش ... راح يخطب ...غيري ؟؟؟؟  أنت انت حيوان أنت رخيس ... ماتحشمش ضيعتيلي عمري و انت تقلي عمري و جاي تقلي مانحبكش وين كان قلبك قبل عام و عامين و ثلاثة هذا وين فقتي ؟؟ هذا وين نزل عليك الوحي و عرفتي أنو مانليقوش لبعضانا ؟؟ بصح الي موش راجل كيفاه تعلميه الرجلة. روح نشالله يخرجو فيك دعاوي الشر الي لميتيهم ....يتبع

الحلقة الرابعة :
الزبالة ماخلانيش نفرغ قلبي سحتني و قالي انتي مهبولة ماشية في الطريق صح كي المهبولة ماشية و نسب في زهري و مكتوبي و عمري الطحان. نسب في مهدي ال*** دخلت على أختي أسمهان و أنا في حالة يرثى لها الدموع و الخناين ....
أسمهان : سملله رحمان الرحيم واش بيك صبرينة يووووون حالتك كيفاه ؟؟
صبرينة : نشبه للمهابل ؟؟
أسمهان : تشبهي ؟؟ والله مهبولة صح واش صرى أوخذي ...
صبرينة : اااااااااا مهدي خلاني و راح يزوج ...يوووون نسيت ..
أسمهان : واش نسيتي ..؟؟
صبرينة : نسيت ماقتلوش تفوووووه عليك ...
أسمهان : ههههه أسكتي برك و أمسحي دموعك الله لا يردو هو الخاسر ..
صبرينة : صبريني صبريني هكاكا مانعرف واش خسر رايح يخطب و نقعد أنا بايرة ...( تبكي بالصوت )
بقيت النهار هذاك عند أسمهان خاتر راجلها عسكري و خفت نروح لدارنا يفيقو بيا و أنا هكاك في حالة كانو عينيا يسيحو طول بالدموع غير نسكت نلقى روحي نبكي كيفاه هانت عليه العشرة و قدر يبدلني بصح ماسقسيتوش شكون هي الكلبة الي نساتو فيا والله ناكلها بسنيا ....
لغدوة روحت لدارنا و غير دخلت ضربتني ريحة القاطو و المقروض ميمي غير سمعتني طالعة في الدروج قفلت الباب باه ماندخلش عندهم ...طلعت للدار ...و غير دخلت تلاقتني ماما ...
شوفي لالاواتك يا الهايشة الطفلة أصغر منك راهي دارت لافار راح تزوج  و أنتي أقعدي غير تمهبلي ...
صبرينة : خير واش كاين ثاني ؟؟
ماما : ميمي راح تتخطب بعد غدوة الفاتحة تاعها و العقد السيد مزروب ...
صبرينة : ميمي؟؟؟ لاااااااااا ! مووووحال !!
ماما : شوفي البنات الفايقات تلعب في رحها صاحبتك ووقت الصح ماسمعتكش و ماقاتلكش ...
صبرينة : بصح علاااه ؟؟ خافت نعاينها و لا نغير منها ؟؟ والله كنت راح نفرح معاها من قلبي غير كون قالتلي ...
فتناها أنا و ماما الحكاية و قلنا ربي يسهل عليهم أصلا مرت عمي أم ميمي تخاف ديما من العين تقول غير هي عبد في الدنيا مدتلي ماما صوارد شريت روب و شوي ماكياج .
كي عرفت ميمي مخبية عليا قلت والله ما زدت حلبتها و لا هدرت معاها نهار الفاتحة نروح مني من الناس و أنا الي  كنت متوقعة  نهار عرسها نكون أنا أختها خاتر هي ماعندهاش خواتاتها كي ماحبتش ربي يسهل عليها ....